Додека целата индустрија се труди да го залепи зборот „ВИ” на секој производ, потрошувачите тивко покажуваат среден прст. Нова анкета меѓу 2.000 испитаници во САД покажува дека 60 проценти од нив сметаат дека брендовите што се фалат со вештачка интелигенција во рекламите се – одбивни. Не импресивни, не модерни. Одбивни.

Бројките одат подлабоко од маркетингот. Дури 86 проценти велат дека не ѝ веруваат целосно на вештачката интелигенција и сакаат да проверат во оригиналните извори. Околу 42 проценти на ВИ-генерираните одговори без наведен извор им веруваат помалку отколку на скриените авионски такси, збунувачките политики за приватност и медицинските сметки – друштво во кое навистина не сакаш да се најдеш. А речиси тројца од четворица велат дека интернетот денес се чувствува „помалку човечки” отколку пред десет години.

Иронијата е што компаниите го гледаат истиот тренд од другата страна и брзаат во спротивна насока. Дури 74 проценти од раководителите велат дека видливоста пред ВИ пребарувачите им е главен приоритет, а 60 отсто пријавиле пораст на сообраќај од такви алатки. Со други зборови, додека обичниот корисник бега од вештачката интелигенција, фирмите ги преправаат своите сајтови за да им угодат на машините, не на луѓето.

Тоа го кажа и Брајан Алви, технички директор на WordPress VIP, кој ја спроведе анкетата: „Луѓето порано градеа сајтови за други луѓе. Сега мора да градиш сајтови за ВИ агенти.” Реченицата е кратка, но во неа е целата приказна на интернетот во 2026 година. Мрежата што беше создадена за луѓе сè повеќе се пишува за алгоритми, а човекот станува случаен сведок на разговор меѓу машини. Дури 80 проценти од испитаниците велат дека информациите на интернет треба да останат отворено достапни – прашањето е дали воопшто некој ги слуша.