Cloudflare им става наплатна рампа на ВИ-ботовите: крајот на бесплатното чешлање туѓа содржина

Компанијата Cloudflare, преку чиишто сервери минува голем дел од светскиот интернет-сообраќај, најави правило што ги допира директно големите играчи во вештачката интелигенција. Од 15 септември 2026, таа стандардно ќе ги блокира таканаречените „мешани” веб-роботи од страниците што прикажуваат реклами – оние ботови што истовремено пребаруваат, дејствуваат како ВИ-агенти и собираат содржина за обука на модели. Правилото важи за нови клиенти, за нови страници на постојните клиенти и за сите бесплатни корисници.

Зад техничкиот јазик стои една проста борба за пари. ВИ-компаниите со години ги „чешлаат” туѓите текстови, слики и податоци за да ги хранат своите модели – без да платат ништо на оние што ја создале содржината. Cloudflare сега им става наплатна рампа. Придружните алатки го кажуваат тоа отворено: Pay Per Crawl, пазар преку кој сајтовите можат да наплаќаат од ВИ-ботовите за секое собирање податоци, и Pay Per Use, модел што наплаќа кога содржината создава вредност. Првите партнери се Ceramic.ai и You.com.

Бројките што ги наведува компанијата објаснуваат зошто воопшто дошло до ова. Ботовскиот сообраќај неодамна за прв пат го надмина човечкиот на интернетот – повеќе од половина од светот што ги посетува страниците веќе не се луѓе. Уште поостро: над 50 проценти од сообраќајот на ВИ-роботите оди на повторно преземање на страници што воопшто не се смениле. Со други зборови, серверите на издавачите ги плаќаат туѓите машини да го читаат истото одново и одново, без корист за никого освен за ВИ-компанијата.

„Сега кога поголемиот дел од сообраќајот на интернетот е нечовечки, мораме да одиме подалеку и да дејствуваме побрзо за да се создаде одржлив екосистем”, изјави Метју Принс, соосновач и извршен директор на Cloudflare. Целта, вели тој, е да ги натера мешаните роботи да го одвојат пребарувањето од ВИ-агентите и обуката – три работи што досега биле спакувани заедно токму за да не се знае кој што зема.

Има и една детаљ што открива кој е навистина на прицел. Според Cloudflare, Google Search има пристап до околу двојно повеќе информации од конкурентите – бидејќи неговиот робот истовремено пребарува и собира за обука, па тешко е да го блокираш едното без да го изгубиш другото. Ова е потег со кој малите издавачи добиваат оружје против неспоредливо помоќни противници. Дали ќе издржи притисокот на компании со буџети поголеми од цели економии, допрва ќе видиме – но за прв пат некој што ги држи цевките на интернетот застана на страната на оние што ја пишуваат содржината, а не на оние што ја земаат бесплатно.