Деца завршуваат на итна поради еднократни вапови од Кина: соседите фаќаат десетици илјади, а кај нас никој не брои

Царинската управа во соседна Хрватска запленила 970 еднократни електронски цигари што малолетници ги нарачувале преку интернет. Стигнувале од Кина и од илегални складишта во Европската Унија – едни за лична употреба, други за препродажба. Приказната е хрватска само на хартија; истите тие вапови, од истите тие складишта, стигнуваат и до децата во Скопје. Границите за нив не постојат.

Лекарите предупредуваат на сè поголем број деца што поради овие уреди завршуваат на итна помош. Само во еден мај, во една загрепска болница на итен прием заврши петмина деца. „Секако имаме сè повеќе пациенти поради вапови, а во последно време сè повеќе труења со производи што се рекламираат како THC вапови”, изјави специјалист по итна медицина. Пациентите се претежно средношколци на возраст од 15 до 17 години, со болки во гради, повраќање, губење свест и состојби налик на епилептични напади.

„Ваквите уреди не се безопасни и токму затоа нивната употреба е забранета за лица под 18 години”, предупреди претставник на заводот за јавно здравје. Царината изрече казни од 4.350 евра, поднесе четири предлози до судот за млади и издаде седум прекршочни налози. Во последната година таму се запленети околу 50.000 електронски цигари – и тоа е само она што е фатено.

А сега вистинското прашање, тоа што никој на шалтерите не сака гласно да го постави: ако соседите фаќаат десетици илјади вапови и децата им завршуваат на итна, што прави нашата царина, нашето здравство, нашите училишта? Истата стока, истата возраст, истата опасност – само без бројки што некој ги брои. Кога проблемот е заеднички, а реакцијата ја има само едната страна на границата, децата ја плаќаат разликата.