Грција најави нови мерки за гранични премини Евзони (кон Македонија) и Кипи (кон Турција) за да го намали хаосот од новиот европски систем за биометриска регистрација (EES). Кој мина последниот месец преку граница со автомобил – знае што значи „чекање”. Кој не – наскоро ќе разбере.

EES бара биометриски податоци за секој патник кој влегува или излегува од Шенген, и тоа поминува покрај стандардните пасошки контроли. На стара инфраструктура како грчките гранични премини, тоа значи дополнителни минути по возило, што во туристичка сезона значи колони од километри. Македонија и Србија веќе доставиле жалби.

Мерките на грчката страна се поделени во два правци. Прво – засилување на IT-системите на терен, за побрза обработка. Второ – привремени технички и физички решенија (нови шалтери, преусмерување на сообраќајот, дополнителен персонал). На состанокот во Солун присуствуваа застапници на регионалните администрации, полицијата, царината и локалните општини. Тоа е координиран план, ама со невидлив ефект за патниците кои денес поминуваат граница.

Заменикот министер за внатрешни работи Константинос Гулекас и министерот за заштита на граѓаните Михалис Хрисохоидис ги признаа причините: „зголемен туризам и трговски сообраќај кон Грција” во комбинација со ЕУ-биометриската директива создаваат „дополнителни доцнења”. Преведено – имаат проблем и тоа го знаат.

Прашањето за Македонија е специфично – дали грчките подобрувања ќе значат олеснување за пред-летниот период (јуни, јули), или ќе бидат завршени дури по падот на сезоната? Грците имаат рок да се прилагодат. Балканските возачи, како обично, чекаат.