Технолошкиот гигант HP Inc објави дека планира да отпушти помеѓу 4.000 и 6.000 вработени ширум светот до фискалната 2028 година, како дел од новиот стратешки план за реструктуирање и агресивно воведување вештачка интелигенција во производствените и административните процеси. Одлуката доаѓа во момент кога целата индустрија се пренасочува кон автоматизација, а работните позиции во развојот на производи, клиентската поддршка и внатрешните операции ќе бидат најмногу засегнати.

Извршниот директор на компанијата, Енрике Лорес, изјави дека новите мерки треба да донесат вкупни заштеди од околу 1 милијарда долари во следните три години. „Вештачката интелигенција го трансформира начинот на кој работиме и мораме да се прилагодиме за да останеме конкурентни“, наведе Лорес на брифингот со медиумите.

HP веќе отпушти дополнителни 1.000 до 2.000 вработени во февруари, во рамки на претходна фаза од реструктуирањето. Новиот бран претставува најмасовно кратење на работни места во компанијата во последната деценија.

Од друга страна, побарувачката за компјутери со интегрирана AI технологија се зголемува со рекордно темпо, а во последниот квартал тие сочинуваа повеќе од 30% од сите испораки на HP. Но, аналитичарите предупредуваат дека растечките цени на мемориските чипови – поттикнати од потребата за инфраструктура за центри за податоци и развој на генеративна AI – би можеле да го намалат профитот на производителите. Компании како Dell, Acer и HP веќе чувствуваат притисок врз маржите, наведуваат од Morgan Stanley.

Стручната јавност оценува дека процесот на трансформација кон AI може драстично да го промени изгледот на технолошкиот пазар, оставајќи илјадници работници пред предизвикот на пренасочување и преквалификација.