Македонија за прв пат од осамостојувањето е избрана во Економско-социјалниот совет на Обединетите нации (ЕКОСОК), и тоа со 174 гласа на гласањето во Њујорк. Земјата ќе членува во ова клучно тело на ОН во периодот 2027-2029 година. Дипломатска победа што, на хартија, изгледа импресивно – 174 гласа не се мала бројка.

ЕКОСОК е едно од шесте главни тела на ОН и игра координативна улога во економските, социјалните, развојните и хуманитарните политики во рамки на системот на ОН. Преку членството, Македонија ќе учествува во дискусии за одржлив развој, социјална правда, економска соработка, човекови права, родова еднаквост, образование и здравство. Местото е реално – прашањето е што ќе се направи со него.

Од Министерството за надворешни работи нагласуваат дека членството ќе ѝ овозможи на земјата поактивно да учествува во глобалните дискусии и ќе го зајакне меѓународниот кредибилитет. Премиерот Христијан Мицкоски го опиша изборот како „признание за вложените напори во надворешната политика и довербата што Македонија ја гради со меѓународните партнери”.

Изборот доаѓа по неодамнешното членство во Советот за човекови права на ОН (2025-2027) и во Извршниот одбор на Организацијата за забрана на хемиско оружје. Низа седишта во меѓународни тела – убава колекција. Но дипломатската победа вреди онолку колку што ќе се преточи во конкретна корист за граѓаните. Седиштето во Њујорк е лесниот дел; да значи нешто за човекот во Македонија – тоа допрва треба да се докаже.