Модата има навика старите работи да ги продава како откритија. Летово тоа е марамата со ресни врзана околу половината – аксесоар што нашите баби го носеле без никој да го нарекува тренд, а сега се враќа како последен збор на стилот.

Идејата е едноставна и токму затоа функционира. Голема марама со ресни се врзува на колкот или на половината, во зависност од фигурата и вкусот, и од обичен изглед прави нешто лично. Стилистите велат дека делува „слично на накит” – украсува и персонализира без потреба од шљокици или сложени детали.

Новата верзија е пософистицирана од лањската шамија околу половината. Доаѓа со сатенски завршетоци, вез и украси што ѝ даваат тежина. Се комбинира лесно: со ленени панталони и бохо сандали за опуштен изглед, со монохроматски комплет за елеганција, или со поедноставна блуза за поформални прилики.

Зошто токму сега? Затоа што е евтин начин да изгледаш намерно стилизирана. Во време кога сите гледаат како да вложуваат труд да изгледаат како да не вложиле, една марама што ја имаш дома или ја купуваш за ситни пари ја прави работата. Балканската жена ова го знае одамна – со една шамија и малку самодоверба, изгледот е решен. Модната индустрија само сега се сети да ѝ стави цена.