Орбан уште не го испразнил кабинетот, а Илон Маск веќе објави кој всушност го презеде. „Структурите на Сорош ја преземаа Унгарија”, напиша Маск на мрежата X, откако Алекс Сорош – синот на Џорџ Сорош – јавно ја поздрави победата на опозицијата.

Значи, според најбогатиот човек на планетата, изборите во Унгарија не се победа на демократијата, туку операција на „соросовските мрежи”. Дали 138 од 199 пратенички места ги обезбеди Сорош, или два милиони Унгарци кои гласаа – тоа очигледно е прашање на перспектива.

Лидерот на победничката партија ТИСА, Петер Маѓар, најави обнова на целосното учество на Унгарија во ЕУ и НАТО – јасен заокрет од политиката на Орбан. Истовремено побара оставки од мнозинството членови на актуелната влада, вклучувајќи го и унгарскиот претседател Тамаш Шујок.

Маск наспроти Сорош, Орбан наспроти Маѓар, Русија наспроти ЕУ – Будимпешта стана арена на глобални судири. А Унгарците? Тие едноставно гласаа. Останатото е геополитички театар во кој секој гледа она што сака да види.