Официјални документи објавени на порталот TetovaSot откриваат дека секој месец од буџетот на Општина Тетово и нејзините јавни претпријатија — ЈКП „Шар“, ЈКП „Тетово“, ЈП „Тетово Транспорт“, „Градски паркинг“ и Агенцијата „ЏОБ 2011“ — се исплаќаат над 10 милиони денари за „привремени вработувања“.

Списокот со стотици имиња и идентични месечни износи, според експертите, претставува најголемата документирана шема за купување гласови во историјата на градот. На хартија се водат како „привремени работници“, но поголемиот дел никогаш не се појавиле на работа. Исплатите се вршат редовно преку јавните претпријатија, со налози потпишани од политички назначени директори.

Во еден месец од тетовскиот буџет исчезнуваат над 10,6 милиони денари, што годишно изнесува повеќе од 127 милиони денари, или преку две милиони евра. За четиригодишен мандат, тоа е сума од над осум милиони евра јавни пари.

Овие средства, кои потекнуваат од џебовите на даночните обврзници, наместо во улици, осветлување, училишта и инфраструктура, завршуваат во политички контролирани исплати. Додека Тетово се соочува со долгови и запоставени комунални проблеми, јавните пари се користат како гориво за одржување на партиска машинерија.

Од Општината и јавните претпријатија досега нема никаква официјална реакција. Институционалниот молк ја продлабочува недовербата кај граѓаните, кои секој ден гледаат како нивните средства се трошат без отчетност.

Аферата бара итна реакција од Обвинителството, Антикорупциската комисија и Министерството за финансии. Потребна е детална ревизија на секоја исплата, проверка на секое име и барање на одговорност од сите што ја злоупотребиле довербата на граѓаните.