Генералниот секретар на НАТО Марк Руте ги отфрли шпекулациите дека САД би можеле да го напуштат алијансата. Во интервју за германскиот „Ди Велт”, Руте изјави дека не верува оти Америка би го направила тој чекор, а американскиот нуклеарен чадор го опиша како „крајна гаранција за безбедноста на Европа”.

Но зошто воопшто треба да се објаснува нешто што би требало да биде очигледно? Затоа што Трамп повторно ги критикуваше НАТО партнерите за „недоволна поддршка” во кампањата против Иран, посочувајќи конкретно Шпанија, Франција и Велика Британија. Секое повлекување на САД од НАТО би барало двотретинско мнозинство во американскиот Сенат – што се смета за крајно неверојатно.

Руте се сретна со Трамп во Белата куќа минатата недела и потоа пренесе дека Трамп бил „јасно разочаран” од поддршката на само неколку земји-членки. Спорните прашања вклучуваат користење воени бази и операции за обезбедување на Ормускиот Теснец.

Генералниот секретар ги повика европските земји да ја зајакнат одбранбената индустрија, тврдејќи дека тоа е суштинско за одржување на капацитетите за одвраќање. Порачката е јасна: Европа повеќе не може да се потпира исклучиво на Вашингтон. Прашањето е дали овој пат ќе слушне.