Има аксесоари што ги вадиме само за свадба, за плажа или за фотографија – а потоа ги враќаме во кутијата за цела година. Ова лето еден таков предмет се врати во секојдневната носија: шеширот од рафија, и тоа во неговата најопуштена форма – моделот „боб” или ведро. Удобен, лесен и за фрлање в торба, тој дава карактер на речиси секоја комбинација без никаков напор.

Рафијата не е нова – тоа е лесно, гипко природно влакно од палмови лисја, главно од Мадагаскар, што со векови се користело за кошници и шешири. Модата ја прифати природно, преку нејзината занаетчиска поврзаност. Од обичен функционален предмет, рафијата стана синоним за опуштен медитерански стил, а имиња како Џејн Биркин и кралски лица како Грејс Кели, принцезата Дијана и кралицата Елизабета Втора докажаа дека може да изгледа и сосема отмено.

Магијата на бобот е во тоа што не бара ништо да му се додаде. Стилистите го носат со опуштени фармерки и бела кошула, со рамни сандали и голема плетена торба – изглед подеднакво добар за плажа и за град. Некои го комбинираат со ленени кошули во беж и црвено, други со здолниште на ситни квадратчиња и кошничка во рака за побукoличен, селски впечаток. Не постои погрешен начин, што е токму поентата.

Зад трендот стои нешто поразумно од обична мода: предмет што чини малку, трае со години и оди со сè. Во време кога секоја сезона ни продаваат нова „задолжителна” работа, шеширот од рафија е потсетник дека најдобрите модни решенија често се најстарите. Балканската баба со сламен шешир в градина го знаеше тоа долго пред подиумите да го откријат.