Ниту еден од 34-те обвинети за пожарот во кочанската дискотека „Пулс“, во кој загинаа 64 лица, а повеќе од 200 беа повредени, не прифаќа вина, покажуваат приговорите поднесени до судот, до кои дошол порталот „Призма“.

Обвинителниот акт содржи 117 страници, од кои 109 се исполнети со приговори на обвинетите и нивните адвокати. Сите тврдат дека немаат одговорност за трагедијата од 2025 година и дека не можат да одговараат за пропусти направени години порано.

Првообвинетиот Дејан Јованов, сопственик на дискотеката, кој се наоѓа во кумановскиот затвор, вината ја префрла на институциите што, според него, не го регулирале објектот, а делумно и на бендот ДНК, кој, наводно, не пријавил дека ќе користи пиротехника. Неговиот син Михаил Јованов и брат Тодор Јованов тврдат дека немале управна улога – едниот се повикува на покоен управител, а другиот дека само продавал влезници.

Меѓу обвинетите има и инспектори, градоначалници, министри и други функционери, кои најчесто се бранат со ненадлежност или недостаток на пријави и налози за делување.

Обвинението, со повеќе од 1.440 докази и 283 предложени сведоци, е едно од најобемните и најкомплексните во поновата судска историја. Адвокатите го нарекуваат паушално и нејасно, со предвидување дека судењето ќе биде маратонско.

Судиите Моника Бахчовановска, Софче Гаврилова-Ефремова и Илија Трпков одлучиле оценката на обвинението да се одвива на затворена седница, иако дел од адвокатите побарале тоа да биде јавен процес.