За прв пат во историјата на Индексот на пасоши „Хенли“, американскиот пасош не се наоѓа меѓу десетте најмоќни во светот. Според најновиот квартален извештај, САД паднаа на 12-то место, израмнети со Малезија, чијите граѓани имаат приступ без виза до 180 од 227 земји и територии.

Македонскиот пасош оваа година е на 42. место, овозможувајќи патување без виза во 129 дестинации ширум светот.

Индексот, кој го составува лондонската консултантска компанија „Henley & Partners“ врз основа на податоци од Меѓународната асоцијација за воздушен транспорт (IATA), ја мери „моќта“ на пасошите преку бројот на земји што може да се посетат без визи или со поедноставени постапки.

Врвот го држат азиските земји

Азиските држави повторно доминираат на листата:

1. Сингапур – 193 дестинации

2. Јужна Кореја – 190

3. Јапонија – 189

Зад нив се Германија, Италија, Луксембург, Шпанија и Швајцарија со по 188 дестинации, а Хрватска првпат влезе во топ 10, надминувајќи ја САД.

Падот на американскиот пасош се поврзува со недостаток на реципроцитет и заострување на визните правила во повеќе земји.

• Бразил во април го укина безвизното патување за САД, Канада и Австралија.

• Кина воведе олеснувања за европски земји, но не и за американските патници.

• Папуа Нова Гвинеја, Мјанмар, Сомалија и Виетнам исто така ги променија своите правила, дополнително ограничувајќи го американскиот пристап.

Претседателот на „Henley & Partners“, Кристијан Х. Каелин, изјави дека падот на американскиот пасош е „фундаментална промена во глобалната мобилност и динамиката на меката моќ“, нагласувајќи дека земјите кои се отворени и соработливи брзо напредуваат, а оние што се потпираат на минатите привилегии заостануваат.