Поранешниот директор на Клиниката за неврологија, д-р Игор Кузмановски, кој пред неколку недели беше разрешен поради компромитирачко видео, се соочува со нови проблеми.

По јавната осуда од граѓаните, моралната осуда од Лекарската комора и паричната казна од Државниот санитарен и здравствен инспекторат (ДСЗИ) за работа со истечена лекарска лиценца, сега против него се подготвува и кривична пријава.

Како што потврдија од МВР за „Фокус“, Кузмановски е пријавен за „загрозување на сигурноста“ според член 144 став 3 од Кривичниот законик.

„На 04.10.2025 во СВР Скопје 54-годишна жена пријавила кривично дело ‘Загрозување на сигурноста’ од страна на И.К. од Скопје. Со И.К. на 07.10.2025 година е извршен службен разговор во полициска станица и по целосно документирање на случајот против лицето ќе биде поднесена соодветна пријава,“ информираат од МВР.

Доктор Кузмановски беше разрешен од директорската функција само два часа по објавувањето на видеото, на кое се гледа како разговара за консумација на дрога, мешајќи бела прашкаста материја во чинија, додека друго лице – наводно снимателот – учествува во разговорот.

Премиерот Христијан Мицкоски, коментирајќи го случајот, изјави:

„Тоа што се случи, се случи. Не треба да се враќаме назад. Тоа што моменти на слабост имал директорот поранешен, претпоставувам него ќе го следи во текот на неговиот живот.“

Со најновата пријава, случајот Кузмановски добива и кривична димензија, а јавноста очекува институциите да утврдат дали поранешниот директор прекршил закон и во други аспекти од своето работење.