Американскиот претседател Доналд Трамп и рускиот претседател Владимир Путин објавија дека следната недела нивните советници ќе одржат состанок на високо ниво, а потоа двајцата лидери ќе се сретнат во Будимпешта.

„Претседателот Путин и јас ќе се сретнеме на договорена локација во Будимпешта за да видиме дали можеме да ја завршиме оваа озлогласена војна меѓу Русија и Украина“, напиша Трамп на својот профил на Truth Social по телефонскиот разговор со Путин.

Според Трамп, Соединетите Американски Држави на средбата ќе ги претставува државниот секретар Марко Рубио, додека точната локација на состанокот ќе биде објавена дополнително.

Унгарија потврди дека е подготвена да ја прими средбата. „Планираната средба е одлична вест за сите мирољубиви луѓе во светот. Ние сме подготвени,“ напиша унгарскиот премиер Виктор Орбан на социјалната мрежа X.

Телефонскиот разговор меѓу двајцата претседатели потврдил потреба од директен дијалог меѓу делегациите, по што е планирано Трамп и Путин лично да се сретнат во Будимпешта со цел да се разгледаат можностите за прекин на конфликтот меѓу Русија и Украина.