Groq, стартапот за ВИ-чипови кој во декември му ја „не-продаде” својата технологија на Nvidia за 20 милијарди долари, сега бара уште 650 милиони долари од истите инвеститори кои штотуку зеле паричен излез. Како што пишува Axios, новата рунда ќе оди во неговиот „inference cloud” бизнис – сервис кој на развивачите им хостира ВИ-апликации.

Зделката со Nvidia беше еден од оние корпоративни договори кои не се продажба ама личат на тоа: дел од сениор-инженерите на Groq отидоа во Nvidia, технологијата на Groq беше лиценцирана, а инвеститорите на Groq добија готовинска исплата – на ниво на она што би било најголемото купување во историјата на Nvidia. Сè без формална зделка за купување. Стандарден силиконски маневар за заобиколување на регулаторите.

Сега истите тие инвеститори се повикани да го финансираат следниот чин. Inference – процесирањето што се случува откако ВИ-моделот ќе го прими прашањето – е во моментот поголема потреба од тренирањето на нови модели. Секој ChatGPT одговор, секое Claude писмо, секое Gemini пребарување е inference. Бизнисот е огромен и Groq го гледа како поле каде може да биде голем играч без да се судри директно со Nvidia.

Финансиската гаранција за 650-те милиони е речиси целосна. Двата постојни инвеститори, Disruptive и Infinitium, ветиле дека ќе ја пополнат рундата ако другите акционери не сакаат пропорционални учества. На јазик на инвестиции – тоа значи дека договорот веќе е затворен, само се чека некој надворешен валидатор да го потпише со повисока цена. Класична позиција од каде растат проценети вредности кои подоцна се покажуваат како преувеличени.