Македонските патници добиваат десет нови авиолинии во рамки на зимскиот распоред на летови 2025/26, соопшти ТАВ Македонија. Од крајот на октомври, аеродромите во Скопје и Охрид ќе добијат нови дестинации и обновени рути кои ќе ја зајакнат поврзаноста со Европа и Азија.

Генералниот директор на ТАВ Македонија, Неџат Курт, изјави дека компанијата веќе преговара со повеќе авиокомпании за директни линии со Данска, Финска и земјите од Блискиот Исток, како и за дополнителни врски со Шпанија и Обединетото Кралство.

Меѓу најочекуваните нови дестинации се Бари, Стокхолм и Базел, со летови кои стартуваат на 27 октомври, а ден потоа, на 28 октомври, Скопје ќе се поврзе првпат со Мадрид, како и повторно со Ларнака. На 15 декември се најавени и нови линии за Прага и Келн.

Проширувањето продолжува и во март 2026 година, кога Виз Ер ќе ја врати линијата Скопје–Будимпешта и ќе воведе нова кон Неапол, додека Охрид ќе добие директна врска со Милано. Десеттата нова рута е Женева, која ИзиЏет ја обновува на 3 ноември.

ТАВ Македонија најавува дека овие новини ќе бидат промовирани на меѓународни туристички настани во Копенхаген, Стокхолм, Тајпеј, Сеул и Токио, во соработка со Националното здружение за дојдовен туризам на Македонија (НАИТМ).

„Со новите линии ја отвораме Македонија кон уште повеќе европски и азиски пазари. Нашата цел е подобра достапност за туристите и поголеми можности за македонските граѓани,“ изјави Курт.