Ако ова лето планирате пат до или преку Хрватска, внимавајте што носите во багажот. Од 1 јуни 2026 година стапија на сила нови царински правила на ЕУ за влез по копно и железница, а дел од нив директно ги засегаат и македонските патници.

Најважно за обичниот патник е ограничувањето на вредноста на стоката што може да се внесе без царина: 300 евра за патување по копно или железница, 430 евра за авион или брод, и 150 евра за деца под 15 години. Сè над тоа подлежи на пријавување и евентуална царина.

Најстрого е правилото за храна. Патниците од земји надвор од ЕУ – значи и од Македонија – не смеат да внесуваат месо и месни производи, ниту млеко и млечни производи. Дозволени се само ограничени количини мед, јајца, храна за бебиња и за домашни миленици. Значи, бурекот со кашкавал за на пат – подобро изеден пред границата отколку конфискуван на неа.

Има лимити и за алкохол и цигари по копно: најмногу 40 цигари, еден литар жесток алкохол или два литри вино и пиво под 22 проценти, односно четири литри вино или 16 литри пиво. Непријавените производи над дозволеното може да бидат одземени, а патникот ризикува и казна. Совет од Метла: пред да тргнете, проверете го багажот – бидејќи граничарот нема да го почитува аргументот „не знаев”.