Електричните тротинети станаа „огромен проблем” – со тие зборови министерот за внатрешни работи Панче Тошковски најави радикални мерки, вклучувајќи можна регистрација, возрасни ограничувања и забрани. А системот „Безбеден град”, тврди тој, веќе спасува животи.

Бројката што ја изнесе е конкретна: од јануари до мај 2026 во сообраќајни несреќи загинале 39 луѓе, наспроти 56 во истиот период лани – намалување од 17 животи. „Сите овие случаи произлегуваат од прекршување на сообраќајните правила”, изјави Тошковски, припишувајќи го падот на засилените контроли и камерите.

Дел од системот веќе ги препознава странските регистарски таблички. Тошковски најави дека наскоро и возилата со странски таблички ќе бидат казнувани – резултати се очекуваат за околу еден месец. Прашањето е зошто тоа не функционирало порано, кога странските прекршители со години возеа како да правилата не важат за нив.

За тротинетите, министерот рече дека се консултирал со повеќе амбасадори за европските искуства и најави законски измени. „Ова бара порадикално решение во однос на забрани, возрасни граници за управување и можеби регистрација”, изјави тој, без да прецизира конкретни казни или постапки.

И тука е вообичаениот балкански редослед на работите – прво проблемот да нарасне до „огромен”, па дури тогаш да се размислува за правила. Тротинетите со години веќе се на тротоарите, меѓу пешаците и децата. Дека сега се „предизвик за безбедноста” не е откритие – откритие е само колку доцна институциите реагираат на нешто што секој граѓанин го гледал одамна.