Додека со години траат дебатите околу согорувањето на отпад во печките на Титан Усје, финансиските резултати покажуваат дека компанијата работи исклучително профитабилно. Само во периодот од 2023 до 2025 година Титан Усје остварил добивка од речиси 85 милиони евра, при што најдобра била 2024 година со профит од над 30 милиони евра. Бројките отвораат прашање дали дел од остварените приходи треба да бидат насочени кон дополнителни инвестиции за намалување на влијанијата врз животната средина и поголема транспарентност кон јавноста.

Според финансиските извештаи, компанијата во 2023 година остварила добивка од 24,6 милиони евра, во 2024 година добивката пораснала на 30,9 милиони евра, додека во 2025 година изнесувала 29,4 милиони евра.

Титан Усје бележи добивки од речиси 30 милиони евра годишно, граѓаните кои живеат во околината на фабриката и понатаму стравуваат за квалитетот на воздухот што го дишат. Не е фер профитот да се приватизира, а потенцијалните ризици по здравјето и животната средина да останат товар на локалното население. Компанија која остварува вакви финансиски резултати има и морална и општествена обврска да покаже дека здравјето на граѓаните е подеднакво важно како и профитот.

      Истовремено, високата профитабилност ја отстранува и секоја можност за оправдување дека евентуалните дополнителни еколошки мерки би претставувале преголем финансиски товар за компанијата. Напротив, бројките покажуваат дека постои простор за уште поголеми вложувања во мониторинг, филтри, модерни технологии и транспарентно информирање на јавноста.

      Од друга страна, ваквите финансиски резултати ѝ даваат одврзани раце и на Владата да инсистира на највисоки еколошки стандарди и строга контрола на работењето. Кога една компанија остварува добивки од десетици милиони евра годишно, тешко може да се прифати аргумент дека исполнувањето на дополнителни еколошки обврски би ја загрозило нејзината економска одржливост. Затоа, јавноста има право да очекува и од компанијата и од институциите да го стават здравјето на граѓаните пред секој друг интерес.

СТОП НА ГОРЕЊЕТО ОТПАД