Snapchat воведува нови ограничувања за најмладите корисници – и официјалното објаснување е заштита од злоупотреба. Но кога една социјална мрежа одеднаш станува загрижена за децата, вреди да се праша и што се случува во судниците зад кулисите.

Според новите правила, корисниците на возраст од 13 до 15 години ќе можат да споделуваат објави во делот Spotlight само со луѓе што и тие ги следат назад. Малолетниците под 16 години добиваат посебен профил за Stories и Spotlight видлив само за пријатели, при што нема да се прикажуваат бројки како број на допаѓања – токму оние мерила што создаваат притисок за натпревар во ангажман.

Досега оваа група можеше да споделува во Spotlight со сите, иако објавите не се поврзуваа со нивниот профил, што спречуваше странци да ги контактираат. Корисниците од 16 до 18 години и понатаму ќе можат да објавуваат пошироко, но ограничено на пријатели, следачи и луѓе со заеднички познаници. Родителите, преку таканаречениот Семеен центар, ќе гледаат колку време децата поминуваат на одделни делови од апликацијата.

Контекстот објаснува дел од оваа ненадејна грижа. Snap годинава порамни тужба во која беше обвинет дека поттикнува зависност од социјалните мрежи, а се брани и од слични случаи низ САД. Тешко е да се одвои новата грижа за безбедноста на децата од притисокот на адвокатите и регулаторите. Слично постапи и Instagram во последниве години, со посебни сметки за тинејџери.

А реакцијата на врвот покажува колку индустријата сè уште негира. Извршниот директор на Snap, Еван Шпигел, во интервју цитираше студии за да каже дека „Snapchat има позитивно влијание врз корисниците бидејќи ги поврзува со пријатели”. Можеби. Но прашањето што останува без одговор е едноставно – ако платформата навистина е толку безопасна, зошто беа потребни тужби за да се воведат овие ограничувања?