Џеф Безос собра уште една бројка што тешко се изговара со просечна плата на ум. Неговиот стартап за физичка вештачка интелигенција, Prometheus, привлече 12 милијарди долари (околу 11 милијарди евра) во нов круг на финансирање, при проценета вредност од 41 милијарда долари. И тоа само една година откако истата компанија собра 6,2 милијарди во првиот круг.

Зад парите стојат имиња што ретко промашуваат кога мирисаат профит: освен Безос лично, во влогот влегоа JPMorgan Chase, Goldman Sachs и BlackRock. Со други зборови, најголемите банки на планетата ставаат пари на идеја што сè уште нема производ на пазар, туку ветување.

А ветувањето звучи амбициозно дури и за стандардите на Силикон Вали. Prometheus, кофондиран од Безос и Вик Бајај (поранешен кофондатор на Verily, биотех-крилото на Google), гради софтвер што го нарекуваат „вештачки општ инженер” – систем што наводно сам ќе дизајнира и произведува сложени физички системи, од млазни мотори до лекови. Засега тоа го работат 150 луѓе во канцеларии во Сан Франциско, Лондон и Цирих.

„Значителната продуктивност во економијата ќе го подигне животниот стандард”, вели Безос – реченица што секој милијардер ја кажува пред да автоматизира нечија работа. Прашањето што не се поставува на ваквите објави е кој точно го добива тој подигнат стандард, а кој останува надвор од сметката.

Бројката од 41 милијарда за компанија без готов производ кажува повеќе за состојбата на пазарот отколку за самата технологија. Кога парите бараат каде да се вложат, ветувањето за „општ инженер” е попривлечно од кој било реален бизнис со реални трошоци. Дали Prometheus ќе изгради млазен мотор – или само уште една презентација за следниот круг финансирање – допрва ќе видиме.