Постои венчаница што не беше бела – и токму таа предизвика една од најголемите кризи во историјата на британската монархија. Кога Волис Симпсон се омажи за поранешниот крал Едвард VIII на 3 јуни 1937 година, на себе имаше фустан во необична сиво-сина боја, избрана намерно да одговара на бојата на нејзините очи. Денес таа нијанса се нарекува „Волис сино”.

Љубовта меѓу нив ја скандализира Британија. Симпсон беше Американка, разведена двапати – неприфатлива за кралското семејство, владата и црквата. Едвард ѝ подари свршенички прстен од Cartier со смарагд од речиси 20 карати, а потоа на 10 декември 1936 година абдицираше од престолот за да може да се ожени со неа, станувајќи војвода од Виндзор. Кога еден крал бира жена пред круна, целата империја останува да расправа кој всушност изгубил повеќе.

Фустанот беше дело на куќата Mainbocher од Париз – свилен креп со кроj по тело и кратко сако со збрчкан горен дел, копчиња напред и набрани ракави. Висока јака украсена со брош од сафир и дијаманти, сламен шешир од Caroline Reboux со тил и пердуви, и накит од Van Cleef & Arpels и Cartier. Сè беше избрано да испрати една порака – оваа жена пишува свои правила.

На венчавката не присуствуваше ниту еден член на кралското семејство. Фустанот денес се чува во музејот Метрополитен во Њујорк, но избледел до кремаво – оригиналното „Волис сино” практично не може повеќе да се пресоздаде. Има нешто симболично во тоа: бојата што предизвика буна избледе со времето, но приказната за жената што го разниша темелот на монархијата заради љубов – таа остана жива.