Рускиот државен медиум РИА Новости објави текст под наслов „Откриена е заверата на Трамп против Русија“, откако Соединетите Американски Држави воведоа нов пакет санкции против руските енергетски гиганти „Росњефт“ и „Лукоил“.

Според Вашингтон, санкциите имаат за цел да го зголемат притисокот врз Москва поради, како што се наведува, „неспремноста на Кремљ да покаже волја за вистински мировен процес во Украина“. Мерките ги опфаќаат и 34 подружници на двете компании, кои се дел од клучната руска енергетска инфраструктура.

Објавата следи по изјавата на американскиот претседател Доналд Трамп, кој потврди дека планираниот самит со Владимир Путин во Будимпешта е одложен на неопределено време.

„Секојпат кога разговарам со Владимир, разговорите се добри, но не водат никаде“, изјави Трамп по средбата со генералниот секретар на НАТО, Марк Руте.

РИА Новости се повикува на анализа на Блумберг, според која новите санкции претставуваат „пресвртница во американската стратегија кон Русија“. Рускиот медиум наведува дека Белата куќа конечно избрала „пат на ескалација“, по период на мешавина од помирливи и заканувачки пораки кон Москва.

Овој дипломатски пресврт доаѓа само еден ден по масовното руско бомбардирање врз Украина, во кое загинаа најмалку седум лица, меѓу кои и деца. Според американските аналитичари, потегот на Трамп има за цел да покаже цврст став кон Кремљ, во момент кога мировните преговори се во застој.

Иако Трамп изјави дека и натаму останува отворен за средба со Путин „во иднина“, Москва засега не реагира официјално. Руски државни медиуми, меѓутоа, тврдат дека новите санкции се доказ за „внатрешна поделба во Белата куќа и пропаѓање на Трамповата политика за рамнотежа меѓу дијалог и притисок“.