Европската унија утрово официјално го одобри 19-от пакет санкции против Русија, насочен кон таканаречената „флота во сенка“, како и кон рускиот банкарски и енергетски сектор, изјави претседателот на Европскиот совет Антонио Кошта на почетокот на Самитот на ЕУ во Брисел.

– „Европскиот совет денеска ќе донесе политичка одлука со која ќе ги обезбедиме финансиските потреби на Украина за 2026 и 2027 година, вклучително и за набавка на воена опрема,“ рече Кошта, придружуван од украинскиот претседател Володимир Зеленски.

Кошта нагласи дека новиот пакет претставува „многу јасна порака до Москва“, дека ЕУ ќе продолжи со поддршката за Украина „сè додека е потребно и колку и да е потребно“.

– „Чест ми е што денес е со нас претседателот Зеленски – лидер на идна земја членка на Европската унија,“ додаде Кошта.

Претседателот на Европскиот совет потсети дека иницијативата на американскиот претседател Доналд Трамп за дипломатско приближување со Русија не дала резултати, бидејќи Москва ја засилила агресијата врз цивилните цели во Украина.

– „Пораката до Русија е јасна: ние не сме уморни. Ќе продолжиме со политичка, воена и финансиска поддршка. Русија мора да престане да убива цивили и да уништува инфраструктура. Зеленски е подготвен за прекин на огнот и преговори – сега редот е на Путин,“ порача Кошта.

Зеленски: „Санкциите се доказ дека Европа стои на страната на правдата“

Украинскиот претседател Володимир Зеленски изрази благодарност до Европската унија за новиот пакет санкции, велејќи дека тој „се надоврзува на вчерашната одлука на Трамп за енергетски санкции кон Москва“.

– „Русија покажува дека не сака да ја запре војната – напаѓа детски градинки, училишта и цивили. Не само што мора да се браниме, туку и да го засилиме притисокот врз агресорот,“ изјави Зеленски.

Тој потенцира дека примирје во Украина е можно, но само ако се зголеми меѓународниот притисок врз Кремљ, додавајќи дека Киев нема да прифати никакви територијални отстапки во замена за мир.

Одговарајќи на новинарско прашање за можната испорака на ракети „Томахавк“ од САД, Зеленски истакна:
– „До неодамна изгледаше невозможно и дека Америка ќе воведе енергетски санкции кон Русија. Но тоа сега е реалност.“