САД објавија нов, проширен пакет санкции против Русија, насочен кон нејзиниот енергетски и финансиски сектор, со цел да се зголеми притисокот врз Кремљ поради продолжената агресија врз Украина.

На удар се најдоа руските нафтени гиганти „Роснефт“ и „Лукоил“, како и 34 нивни подружници кои, според американското Министерство за финансии, „директно придонесуваат за финансирање на руската воена машинерија“.

„Со овој пакет санкции испраќаме јасна порака: Русија нема да може неказнето да профитира од продажба на енергенси додека уништува украински градови,“ изјави американскиот министер за финансии Скот Бесант, најавувајќи ги мерките на 23 октомври.

Новиот пакет предвидува замрзнување на средствата и забрана за трансакции со санкционираните компании, како и ограничувања за набавка на технологии и осигурување на транспорт на руска нафта.

Паралелно со тоа, Европската Унија утрово го усогласи својот 19-ти пакет санкции против Русија, потврди агенцијата Ројтерс, повикувајќи се на данското претседателство со Советот на ЕУ.

Мерките на ЕУ се насочени кон т.н. „флота во сенка“ – бродови што Русија ги користи за транспорт на нафта надвор од регулативите за ценовен плафон, како и кон руските банки и компании поврзани со одбранбената индустрија.

„Ова е координиран потег со нашите американски партнери. Европа не е уморна и ќе продолжи да ја поддржува Украина – политички, економски и воено,“ изјави висок европски дипломат за Ројтерс.

Според аналитичарите, оваа заедничка акција на САД и ЕУ претставува најголема синхронизирана економска офанзива против Русија во последните шест месеци, насочена кон изолирање на нејзините извори на приходи.

И покрај санкциите, Москва засега не даде официјален одговор, но руските државни медиуми ги опишуваат мерките како „нов обид на Западот да ја задуши руската економија пред почетокот на зимата“.