Понекогаш е доволно туристите да погледнат на карта за да се вратат. По месеци пад предизвикан од кризата со Иран, источниот Медитеран повторно живнува – Турција, Египет и Кипар ги намалија цените, а резервациите нагло скокнаа.

Падот започна на крајот на февруари, кога нападите на САД и Израел врз Иран предизвикаа бран откажувања. Патниците се исплашија од ескалација и масовно ги отакжаа аранжманите за регионот. Но стравот, како што често бива, беше поголем од реалната опасност. „Патниците погледнаа на карта и сфатија дека Суецкиот канал не е исто што и Хормузскиот теснец“, рече извршниот директор на еден нискобуџетен превозник, опишувајќи го тоа како „одлична лекција по географија“.

Кога стравот спласна, останаа две работи: пониски цени и слободни капацитети. Хотелите низ регионот понудија значителни попусти, што ги направи поконкурентни од шпанските дестинации со слична цена. Резултатот е јасен во бројките – пребарувањата за Турција и Египет пораснаа за една третина во средината на јуни, Кипар скокна за 29 проценти, а Египет за неколку недели се врати од минус во силен плус.

Се смени и профилот на патникот. Наместо семејства, кои веќе се определиле за други дестинации, сега доминираат помлади парови што бараат поволна цена во последен момент. За балканскиот турист, кому летувањето секоја година му е се поскапа сметка, поуката е практична: кога другите се плашат, цените паѓаат – а понекогаш токму таму, каде сите бегаат, се крие најдобрата понуда. Стравот е скап; географијата е бесплатна.