Стапката на невработеност во еврозоната во септември останала непроменета на 6,3 проценти, покажуваат најновите податоци на Евростат, пресметани според методологијата на Меѓународната организација на трудот (ILO).

И на нивото на Европската унија, невработеноста се задржала на 6 проценти, исто како и во август.

Во споредба со истиот месец лани, бројките покажуваат стабилност, бидејќи во септември 2024 година еврозоната бележеше идентична стапка од 6,3 проценти, а ЕУ 5,9 проценти.

Според проценките на Евростат, во септември без работа биле околу 13,25 милиони граѓани на ЕУ, од кои над 11 милиони живеат во земјите на еврозоната.

Меѓу земјите-членки, Шпанија и натаму е на врвот со највисока невработеност – 10,5 проценти, по што следат Финска (9,8%) и Шведска (8,7%).

Најниски стапки на невработеност имаат Чешка и Малта – по 3 проценти, додека Словенија (3,1%) и Полска (3,2%) се веднаш зад нив.

Податоците потврдуваат дека, и покрај економските предизвици и притисоците врз пазарот на труд, европската економија засега успева да ја задржи стабилноста на вработеноста.