Катар ја предупреди Европската Унија дека би можел целосно да го прекине извозот на течен природен гас (LNG) доколку Брисел не ја олесни Директивата за одржливост на корпорациите (CSDDD) – новиот регулаторен механизам кој бара од компаниите детално да го следат влијанието на нивните синџири на снабдување врз човековите права и животната средина.

Министерот за енергетика на Катар и шеф на „QatarEnergy“, Сад Шерида ал-Каби, изјави на конференцијата ADIPEC дека доколку директивата продолжи да важи во сегашната форма, Европа ќе остане без катарски гас.

„Доколку Европа не ја укине или барем не ја олесни директивата CSDDD и продолжи да наметнува казна од 5% врз продажбата на енергија, нема да испорачуваме LNG во Европа,“ – предупреди ал-Каби.

Катар моментално обезбедува околу 12–14% од европските потреби за течен природен гас, а евентуалното прекинување на испораките би можело сериозно да ја погоди енергетската стабилност на континентот во пресрет на зимската сезона.

Министерот додаде дека земјата ќе бара алтернативни пазари, доколку не се постигне компромис со ЕУ, и потсети дека уште во 2022 година Катар побарал долгорочни договори од 20 години со европските земји, но дел од нив ги одбиле како „престроги“.

Ќе ја задржи ли Европа својата зелена стратегија по цена на енергетска несигурност – или ќе попушти пред најголемиот извозник на течен природен гас во светот?