Голманот на Реал Мадрид, Тибо Куртоа, го отвори погледот кон својот дом крај Мадрид – и тоа не е обична вила, туку имот вреден околу 6 милиони евра што повеќе личи на приватен спортски центар отколку на куќа за живеење.

Резиденцијата се наоѓа во Лас Ломас де Боадиља дел Монте, една од најексклузивните населби во околината на Мадрид, со 24-часовно обезбедување, зеленило и училишта на дофат. Целиот имот се протега на 15.000 квадратни метри, од кои самата куќа зафаќа 6.000 квадратни метри на три ката – едниот вешто скриен од погледот – опкружена со приватна шума.

Архитектурата е замислена како биоархитектура, во хармонија со природата: природни материјали, меки линии и големи прозорци што ја внесуваат светлината внатре. Куќата има соларни панели и геотермално климатизирање – луксуз што, барем на хартија, се обидува да биде и енергетски одржлив. Дизајнот го потпишува архитектонско студио од Дубаи, во модерен минималистички стил.

Она што ја издвојува куќата е списокот содржини што би го посакал секој професионален спортист: внатрешен и надворешен базен, приватна теретана, сопствено фудбалско игралиште, терени за падел и тенис, па дури и карт-патека. Тука е и детска зона, простран гараж за колекцијата луксузни автомобили (Ferrari, Rolls-Royce, Aston Martin) и посебна соба за трофеи.

Личниот печат е испишан на самата фасада – џиновски букви „T“ (Тибо), „M“ (Мишел, неговата сопруга) и бројот „1“, дресот што Куртоа го носи на голот. Со Мишел Герциг, за која се венча во јуни 2023, имаат ќерка Ели, а голманот има уште две деца од претходна врска.

Врската со Шпанија за него не е само работна. „Шпанија е мојот втор дом. Не би рекол дека сум половина Шпанец, но речиси; имам две деца со шпански пасош“, вели Куртоа. Со годишна заработка од околу 15 милиони евра во Реал Мадрид, ваквиот имот за него е во граници на можното – но за просечниот навивач што ноќва пред екранот за да го гледа како брани, тоа е свет оддалечен колку и самиот терен.