Еден од најпочитуваните брендови во светот на прогресивниот хаус и техно, Balance, се враќа во Хрватска од 6 до 10 август со петдневно издание во The Garden Tisno. Фестивалот, познат по прочуената серија микс-албуми Balance, ја носи својата длабока и мелодична електроника на една од најпознатите фестивалски локации на Јадранот.

Balance Croatia оваа година донесува лајнап од над деведесет изведувачи, меѓу кои се едни од најголемите имиња на прогресивната сцена. На плакатот се аргентинскиот мајстор Ернан Катанео, Гај Џеј, Гај Манцур, Џереми Оландер, Ли Бариџ и Патрис Боумел, како и легендите Џон Дигвид, Саша и Дени Тенаглиа. Станува збор за состав кој ретко се среќава на едно место, што фестивалот го прави задолжителна дестинација за љубителите на длабоката електроника.

Програмата се одвива на три сцени и еден брод, со сетови кои траат од ден до ноќ, а веќе првата вечер на 6 август е закажан афтерпарти во легендарниот Barbarella’s. The Garden Tisno, со својата позиција директно покрај морето, нуди амбиент во кој музиката и природата се спојуваат – едно од главните нешта поради кои техно публиката од цела Европа секое лето доаѓа на овој дел од Јадранот.

Фестивалот е наменет за посетители над 18 години, а билетите се продаваат преку официјалните канали. За љубителите на прогресивниот хаус и техно од Македонија и регионот, Balance Croatia е една од најсилните електронски дестинации на летото, со лајнап кој оправдува и подолго патување.