Не секое злосторство во војна го прави непријателот. Украина уапси десет свои војници – меѓу нив и поранешен командант на бригада – осомничени за киднапирање и убиство на двајца браќа. Приказна што покажува дека распаѓањето на дисциплината во војна не бира страна.

Според истрагата, во ноќта меѓу 27 и 28 јуни, група поврзана со 155-та бригада „Ана Киевска” упаднала во куќа во селото Калиновка, Киевска област, ги киднапирала браќата Максим и Роман Мосејчук, ги однела во Полтавската област и таму ги убила. Меѓу приведените е и поранешниот командант на бригадата, уапсен во Киев додека патувал со својот адвокат. Иронијата е горка: таткото на убиените браќа загинал служејќи во украинската војска, а самиот Максим бил поранешен војник.

Претседателот Володимир Зеленски вети темелна истрага: „Сето тоа што го направија ќе биде детално испитано. Ова не е случај што се однесува само на една заедница или само на Киевската област.” Врховниот командант Олександар Сирски беше уште поостар – виновните „ќе одговараат за секое сторено злосторство, без разлика на функцијата или претходната служба”.

Но ова не е изолиран инцидент. Истата 155-та бригада, претставена како модернизациски проект со француска и меѓународна поддршка, со месеци се дави во скандали – лошо раководство, масовно дезертирање, претходни обвиненија за злоупотреби. Претходникот на овој командант бил уапсен во слични околности. И тука е поуката што ретко се кажува наглас: војната не создава само херои, туку и чудовишта, и тоа од сопствените редови. Кога државата ќе им даде оружје и моќ на луѓе без контрола, некои од нив ќе ја свртат таа моќ токму кон оние што требало да ги штитат.