По објавениот новинарски текст на „Метла“ за лошата состојба на автопатот Миладиновци – Куманово, денес започнаа градежните активности за негова реконструкција. Иако засега нема официјални информации од надлежните институции, јавноста со право се надева дека оваа реакција е директен одговор на укажувањата кои медиумот ги изнесе пред само неколку дена.

Освен тоа, останува клучното прашање: дали реконструкцијата се изведува како рекламација – поради лошо изведени работи во минатото – или повторно ќе се плаќа од буџетот за нешто што веќе еднаш е платено? Транспарентноста и отчетноста кон граѓаните наложуваат јасен одговор.

Се надеваме дека надлежните институции ќе ги објават сите детали, вклучително и:

• колку ќе чини реконструкцијата,

• кој е изведувачот,

• дали средствата потекнуваат од рекламација, и

• во кој рок ќе биде завршена.

„Метла“ ќе продолжи да ја следи оваа тема и да ја информира јавноста. Останува да видиме дали ова е почеток на поодговорно однесување во корист на граѓаните – или повторно уште една градежна приказна со нејасен крај.

Во прилог дел од текстот:

По завршувањето на реконструкцијата на делницата «Автопат А1 (Миладиновци-Куманово)» која ја опфати левата и десната коловозна лента — левата коловозна лента беше рехабилитирана во периодот февруари 2016 – август 2017, со конечен договор за градежни работи завршен 10 септември 2019; а десната коловозна лента започна реконструкција во декември 2023 со планирано завршување октомври 2024. — јавно беше прославена како инфраструктурно вложување.

Сепак, денес возењето по автопатот е вистинска катастрофа, особено по десната коловозна лента, која е забележливо брановидна (асфалтот прави „брчки“, се чувствуваат нерамнини) и која ја отежнува нормалната брзина и комфор при возење. И покрај тоа што „реконструкцијата е завршена“, состојбата во пракса укажува на спротивното: вложените средства практично се фрлени, бидејќи не е обезбедено квалитетно ниво на изведба.