Човекот што со години продаваше „машка доминација” како животна филозофија и заработуваше милијарди прегледи од тоа, сега седи во американски притвор. Андру Тејт и неговиот брат Тристан се уапсени во Мајами – и приказната што ја градеа како непобедливи наеднаш изгледа многу поинаку.

Американската федерална полиција ги приведе двајцата браќа по барање за екстрадиција од Велика Британија. Британските власти ги истражуваат за сексуални деликти, а пријавите доаѓаат од седум жени. Наводите се однесуваат на настани во источна Англија, северно од Лондон, во периодот меѓу 2010 и 2017 година.

Бројките се тешки. Андру Тејт се соочува со 42 обвиненија, меѓу кои силување, трговија со луѓе и поседување несоодветни материјали со малолетници. Неговиот брат Тристан е обвинет по 17 точки – сексуален напад, силување и трговија со луѓе. Двајцата тврдат дека се невини.

Нивниот адвокат Џозеф Мекбрајд вели дека Британија прекршила долгогодишен договор со Романија да не бара екстрадиција додека траат постапките таму. Зашто и Романија ги обвинува браќата – за трговија со луѓе и сексуална експлоатација низ Романија, Британија и САД. Тие ги негираат сите обвиненија, доследно и гласно, како што и досега негираа сѐ.

Андру Тејт стана познат токму со ширење контроверзни ставови за машка супериорност и за подреденост на жените. Неговите содржини собраа милијарди прегледи пред платформите да почнат да го ограничуваат. Цела една генерација момчиња го слушаше како пример за успех – додека сега тој самиот бара начин да не заврши пред британски суд.

Браќата се преселија во Флорида во февруари 2025 година, откако Романија ги укина патувачките ограничувања – потег што предизвика нова државна истрага. Дури и гувернерот Рон Десантис јавно порача дека не се добредојдени во неговата држава. Приказната за „алфа-мажите” што ги учеа другите како да живеат, се сведе на прашање кое суд ќе го решава: што навистина се случувало зад камерата?