Компанијата Okta, една од најголемите на пазарот за управување со дигитални идентитети, го купува стартапот Permiso Security. Официјално – без објавена цена. Неофицијално – околу 200 милиони долари (нешто под 175 милиони евра), речиси целосно во кеш, според извор запознаен со договорот. Кога портпаролот на Okta беше прашан дали бројката е точна, не ја оспори. Тоа во оваа индустрија значи потврда.

Permiso излезе од сенка во 2022 година и до денес собрала само околу 29 милиони долари, од кои 18,5 милиони во серија А во април 2024 година, предводена од Altimeter Capital. Таа рунда ја вреднуваше фирмата на околу 80 милиони долари. Две години подоцна се продава за 2,5 пати повеќе. Основачите се Пол Нгујен и Џејсон Мартин, поранешни раководители во FireEye – луѓе што целата кариера ја граделе на фаќање напаѓачи што влегуваат со украдени пристапни податоци.

Тоа е и целата логика на купувањето. Досега фирмите за идентитети заработуваа од проверката на влезот – дали си тој што тврдиш дека си. Сега тежиштето се поместува на она што се случува откако вратата е отворена: што прави корисникот, што прави апликацијата, и што прави ВИ агентот кому му дадовте пристап до системот. Permiso го прави точно тоа – следи сомнителна активност во облачни средини откако пристапот е одобрен, а во последно време ги надгледува и автономните агенти.

Во април стартапот пушти и платформа со име SandyClaw, наменета да ги анализира вештините на ВИ агентите во изолирана околина и да открие злонамерно однесување пред да бидат пуштени во работа. Прочитајте ја таа реченица уште еднаш во контекст на неделава: изолирани околини за тестирање ВИ модели се токму местата од кои во последните десет дена двапати излегоа модели што не требало да излезат.

„Permiso ќе ја прошири безбедносната мрежа на Okta со докажани способности за откривање и одговор на закани врз идентитетите”, изјави Ели Кан, главен производен директор на Okta. Договорот се очекува да се затвори во третиот квартал од фискалната 2027 година.

Она што вреди да се забележи не е цената, туку што ја оправдува. Пазарот повеќе не се шири поради нови корисници – луѓето на светот се веќе избројани. Се шири затоа што секоја компанија додава софтвер што дејствува сам, а секој таков софтвер бара свој идентитет, свои дозволи и свој надзор. Купувањето на Permiso е обложување дека машините ќе бидат побројни од вработените – и дека некому ќе му треба да ги гледа сите нив.