Шест луѓе, меѓу кои три деца, загинаа на преполна плажа кај црноморското летувалиште Геленџик. Ранети се околу 40 лица, седумнаесет од кои се хоспитализирани. Тоа го соопшти гувернерот на Краснодарскиот крај, Венијамин Кондратјев, кој го опиша настанот како украински напад со дрон.

Кондратјев тврди дека нападот бил насочен кон цивилни објекти и дека деловите од соборениот дрон паднале врз туристичката населба Архипо-Осиповка. Руските тврдења за целта на нападот не можеа независно да се потврдат.

Што точно паднало врз луѓето – никој не го потврдува

Внимавајте на разликата, бидејќи во неа лежи целата приказна. На социјалните мрежи се појави снимка која наводно го прикажува дрон што паѓа меѓу луѓето на плажа, по што следи силна експлозија. Руските власти, сепак, не потврдија дека летелката паднала директно меѓу капачите – според нивната верзија, загинатите и ранетите настрадале од крхотини на дронот по неговото соборување.

Тоа е важно разграничување и не е случајно. Ако дронот е соборен над плажа полна со луѓе, тогаш прашањето не е само кој го пуштил – туку и кој одлучил да го собори токму таму. Одговорот на тоа прашање не го дава ниту едната страна.

Руските медиуми пренесуваат сведочења на луѓе кои тврдат дека дроновите летале непосредно над плажа. Еден очевидец раскажал дека луѓето во паника се криеле зад карпи и се покривале со лежалки.

Дваесет километри до „Путиновата палата”

На околу дваесетина километри воздушна линија од местото на паѓањето се наоѓа резиденцијата која странските и руските медиуми ја нарекуваат „Путиновата палата” – луксузен комплекс на брегот чија вредност се проценува на над милијарда евра. Воздушниот простор над него е затворен за летови, а Федералната служба за безбедност вели дека мерките се воведени поради засилена активност на странски разузнавачки служби.

Значи: над палатата – забранета зона и посебен режим на заштита. Над плажа со семејства – противвоздушна одбрана која соборува дрон и крхотините паѓаат врз лежалките. Кремљ тврди дека палатата не е Путинова, туку приватен проект на неоткриени бизнисмени.

Прашањето кое се пишува само: што било приоритет во тие мерки за заштита?

Бројките од таа ноќ

Руското Министерство за одбрана соопшти дека помеѓу вечерта на 2 август и утрото на 3 август над повеќе руски региони, Крим и Црното Море вкупно 131 украински дрон бил пресретнат или уништен. Украинската страна засега не се произнесе за наводите на руските власти.

Ден претходно, во Белгородската област, дрон паднал во близина на детско игралиште во селото Принцевка. Загинала тринаесетгодишна девојка, ранети се две девојчиња на седум и девет години.

Летувалиште во август, детско игралиште во село. Ова е трета година од војна во која фронтот повеќе не е линија на карта, а плажата и игралиштето влегоа во истата статистика како и позициите.