Новиот европски систем за влез и излез, познат како EES, требаше да ги забрза границите. Наместо тоа, чекањата на најголемите европски аеродроми се удвоија. Бројките доаѓаат од анализа базирана на податоци од мерења на аеродромски редици, а тие не остават многу простор за интерпретација.

Франкфурт: максималното чекање во јули достигна 120 минути, наспроти 60 минути истиот месец лани. Минхен: од 31 на 60 минути. Амстердам: од 80 на 120 минути. Значи, точно двојно, на трите најпрометни точки во Западна Европа.

Кого точно го чека тоа

Ова е местото каде приказната престанува да биде туѓа. EES бара од патниците што не се граѓани на ЕУ да остават биометриски податоци при првото влегување – отпечатоци, фотографија, лични податоци. Македонскиот пасош е токму во таа категорија. Односно, редицата од 120 минути во Франкфурт не е редица во која стојат Германците. Тоа е редицата за нас.

Извршниот директор на Ryanair го рече она што авиокомпаниите го мислат: системот е замислен така што само во Европа можеле да го смислат. Тој бара претходна регистрација преку интернет и тврди дека сериозни гужви има на околу 15 аеродроми.

Седумдесет секунди на хартија

Европската комисија возвраќа со своја бројка: просечната регистрација трае околу 70 секунди, а од стартувањето на системот се евидентирани 160 милиони влезови и излези. Седумдесет секунди звучи безболно. Помножете го тоа со еден полн авион од 200 патници на еден шалтер и добивате повеќе од три часа – и веднаш станува јасно дека проблемот не е во просекот, туку во тоа колку шалтери работат.

Дека системот не функционира како што ветува, најдобро говори следново: осум земји членки и Швајцарија побарале продолжување на привремените изземања од дел од проверките, кои треба да истечат во септември. Кога државите што го воведоа системот бараат одложување од сопствениот систем, тоа не е техничка ситница.

Ова лето многу семејства од регионот патуваат преку токму тие аеродроми. Совет што не чини ништо: сметајте на дополнителен час на границата при првото влегување со биометриска регистрација и не купувајте кратки врски меѓу два лета. Системот, барем засега, не ве чека вас – вие го чекате него.