Правилникот за прием на студенти во државните студентски домови, член 13, е напишан со големи букви таму каде што е важно: „Списокот на студентите СО ДОБИЕНИТЕ БОДОВИ се објавува на интернет страницата на Министерството за образование и наука и на интернет страницата на домовите.“

Правилникот е нов – донесен пред околу два месеца. На него стои потписот на министерката за образование и наука Весна Јаневска.

А Министерството објави само списоци на примени студенти по домови. Со лични и административни податоци, но без колона со освоените бодови врз основа на кои е извршено рангирањето.

Одговорот: „лажни вести“

Јаневска ги отфрли обвинувањата. Тврди дека сите приеми се реализирани по регуларен пат, а одбиените не ги исполнувале условите.

„Жалосно е што во јавноста се шират дезинформации. Ранг-листите се објавени, како за примените, така и за непримените, со објаснување зошто не се примени“, изјави министерката. Посочи дека меѓу одбиените има студенти кои студираат седма или осма година, како и студенти чии родители имаат високи приходи. Критериумите, вели, се јавно објавени во огласот.

Проблемот е што опозициската Левица не ја оспорува ниту постапката ниту критериумите. Го поставува едно прашање: каде се бодовите?

Зошто бодовите не се административен детал

Правилникот детално определува како се пресметуваат – според категоријата, успехот, семејно-материјалната положба и редовноста во студирањето, со утврдени формули и максимум од 100 бодови.

Ако бодовите се основа за рангирање, а листите се објавуваат без нив, тогаш студентот нема како да провери зошто еден кандидат е примен, а друг одбиен. Не може да види каде е пресечена границата, ниту дали критериумите биле применети еднакво кон сите.

Со други зборови: објавена листа без бодови не е проверлива листа. Таа е соопштение.

Ова го предупреди и Државниот завод за ревизија

И тука приказната престанува да биде партиска препирка. За конкурсот 2022/2023 ревизорите не добиле поткрепувачка документација дека МОН извршило бодирање – утврдиле дека апликациите биле обработувани рачно и внесувани во Excel-табели, без бодување.

Заклучокот на ДЗР беше јасен: непостоењето бодирање и таквото објавување на ранг-листите овозможува субјективно постапување и фаворизирање.

Значи не станува збор за нова теорија што ја измислила опозицијата. Станува збор за проблем што државниот ревизор веќе го документирал, а Правилникот од пред два месеца требало токму тој проблем да го затвори.

Едно прашање, еден одговор

Прашањето е тесно и има точен одговор: во кој документ, на која страница, стојат бодовите на примените и одбиените кандидати?

Кога на такво прашање се одговара со „се шират дезинформации“, тоа не го затвора прашањето. Го подвлекува.

Објавувањето на една колона со броеви е работа од десет минути. Сè друго е избор.