Авиосообраќајот ширум светот се соочува со сериозни нарушувања откако европскиот авиопроизводител „Ербас“ објави дека привремено ќе приземји над 6.000 свои авиони поради потенцијален софтверски дефект поврзан со силната сончева радијација. Проблемот, откриен за време на истрага на неодамнешен инцидент во воздухопловството, најмногу ги погоди „Ер Франс“ и „Американ ерлајнс“, кои веќе откажаа десетици летови.

Причината за драматичниот чекор на „Ербас“ е инцидент од минатиот месец кога авион на „ЏетБлу“, на лет од САД кон Мексико, ненадејно изгубил висина и бил принуден итно да слета во Флорида. При инцидентот биле повредени најмалку 15 патници. Истражувачите утврдиле дека податоците од системот за пресметка на висината кај семејството авиони А320 биле привремено нарушени под влијание на интензивна сончева радијација.

„Ербас“ потенцира дека ваков случај е регистриран само еднаш, но одлучиле на превентивно затемнување на флотата за да се гарантира максимална безбедност. Мерката се однесува на моделите А318, А319, А320 и А321 – најраспространетите патнички авиони во светот.

Според компанијата, околу 5.100 авиони ќе можат да се вратат во употреба по кратко софтверско ажурирање кое трае околу три часа. Кај други 900 постари авиони ќе биде неопходна физичка замена на компјутерски компоненти, што значи подолготрајно приземјување и дополнителни нарушувања во сообраќајот.

Последиците веќе се чувствуваат. „Ер Франс“ утрово откажа 50 летови од и кон Париз, а „Американ ерлајнс“ соопшти дека дури 340 авиони од нивната флота се засегнати, што ќе резултира со одложувања и преорганизација на летовите низ САД.

„Ербас“ се извини до авиокомпаниите и патниците и најави дека процесот на ажурирање ќе се одвива забрзано со цел најголемиот дел од засегнатите авиони да се вратат во употреба во што пократок рок. Сепак, експертите предупредуваат дека ваквото глобално приземјување е едно од најмасовните во комерцијалната авијација во изминатата деценија и дека следните денови ќе бидат критични за стабилизација на летовите.