Waymo за прв пат се задолжува: 5 милијарди долари кредит за роботаксијата, додека две американски агенции ги истражуваат поради училишните автобуси

Пет милијарди долари (околу 4,3 милијарди евра) – толку позајми Waymo, компанијата за роботаксија под чадорот на Alphabet, сопственикот на Google. Тоа е првиот долг во нејзината историја. Меѓу кредиторите се PIMCO, Blackstone и Sixth Street, а списокот продолжува со Apollo, Blue Owl, Oaktree, Fidelity, Franklin Templeton, T. Rowe Price, Capital Group и уште неколку големи имиња од Волстрит. Целиот аранжман го водеше Goldman Sachs.

Досега Waymo живееше од парите на мајката-компанија и на надворешни инвеститори. Во февруари собра 16 милијарди долари (околу 13,8 милијарди евра) при проценета вредност од 126 милијарди долари, а пред тоа 5,6 милијарди во 2024, 2,5 милијарди во 2021 и 3,2 милијарди во 2020 година. Сега компанијата тоа го претставува како чекор во својата еволуција во „комерцијален бизнис што се шири“. Во превод: роботаксито веќе не е експеримент што го финансираат верници, туку бизнис на кој кредиторите се подготвени да му позајмат.

Од Waymo велат дека кредитот ќе им даде финансиска флексибилност и ќе го зајакне билансот, за да можат да ги искористат „значајните можности што следат, особено како бизнис со докажана комерцијална побарувачка и подобрени резултати за безбедноста на патиштата во заедниците каде што работиме“. Колку точно ќе трошат и на што, не кажаа.

Ширењето е реално. Од проект во рамките на Google што со години возеше тестови низ Силиконската Долина, Waymo во 2016 стигна до Финикс, а во август 2023 ја доби последната дозвола да наплаќа возења во Калифорнија. Денес вози во 15 пазари: Лос Анџелес, Сан Франциско, Сан Диего, Остин, Далас, Хјустон, Мајами, Орландо, Тампа и други. Тестира во Лондон и Токио и планира да почне со услуга и таму. Европа засега ја гледа приказната од тротоарот.

Но заедно со возилата растат и истрагите. Американската агенција за безбедност во сообраќајот NHTSA отвори истрага за незаконското однесување на роботаксијата околу училишните автобуси, а потоа и втора, откако возило на Waymo удри дете во близина на училиште. Детето се здобило со лесни повреди, а возилото се движело со околу 10 километри на час. Годинава и Националниот одбор за безбедност во транспортот NTSB отвори своја истрага, откако роботаксијата повеќепати биле забележани како незаконски поминуваат покрај запрени училишни автобуси во најмалку две американски држави. Кредиторите се обложија на побарувачката. Дали парите ќе стигнат побрзо од одговорот зошто машината не застанува пред училишен автобус?