Бугарскиот претседател Румен Радев изјави дека Бугарија ја поддржува европската интеграција на Македонија, но дека процесот не смее да се одвива на сметка на правата на бугарската заедница во земјата. Тој порача дека вклучувањето на Бугарите во Уставот на Република Северна Македонија може значително да го забрза отворањето на пристапните преговори со Европската Унија, пренесе БТА.

„Вклучувањето на Бугарите во Уставот значително ќе го забрза патот на земјата кон ЕУ и се надевам дека нашиот југозападен сосед ќе го стори тоа што е можно поскоро“, изјави Радев на средба со претставници на организации на бугарската заедница од Битола, Охрид, Скопје, Прилеп, Кавадарци и Кочани.

Според него, обврска на секоја демократска држава е да ги гарантира правата на сите граѓани, вклучувајќи го и нивното право на самоопределување. Тој додаде дека евроинтеграцијата не смее да биде оправдување за занемарување на основните човекови права.

Претставниците на бугарските организации изразија надеж дека Македонија нема да ја користи бугарската заедница како алиби за одолговлекување на реформите и се изјаснија против уставни измени со одложено дејство. Тие нагласија дека како лојални граѓани очекуваат државата да им гарантира еднаква заштита и недискриминација.

Во меѓувреме, Комисијата за надворешна политика едногласно усвои декларација со која се осудува насилството врз новинарот Владимир Перев, истакнат бранител на правата на Бугарите во Македонија. Во документот се бара прекин на изјави кои го оправдуваат насилството и признавање на сериозноста на проблемите со правата и безбедноста на бугарската заедница.