Стартапот Ambi собра 26 милиони долари за апликација што те слуша цел ден: дека ги снима и другите, ќе мора да им кажеш сам

Догмата на Силикон Вали гласи вака: вештачката интелигенција ти помага онолку колку што знае за тебе. А за да знае сè, мора да слуша, да гледа и да снима сè. Стартапите градат такви производи без многу двоумење, убедени дека пазарот за личен асистент е доволно голем да ја проголта и загриженоста за приватноста.

Последниот во редицата е Ambi, кој го води поранешниот менаџер на Plaud, Питер Мо. Компанијата објави дека собрала 26 милиони долари (околу 22 милиони евра) во повеќе рунди предводени од Luminous Ventures, фондот што вложувал во Meituan и Unitree Robotics, и од производителот на електроника Huaqin.

Ambi пушта апликации за iPhone, Mac и Apple Watch. Работат како бележник за состаноци, но корисникот може да ги остави да слушаат цел ден и да собираат контекст. Ветувањето е агентот да реагира уште додека трае разговорот: да предлага, да вади релевантни информации од календарот, од претходните состаноци, од базата на знаење и од интернет. „Интелигенцијата е заробена на екранот. Ако користиш уред како Plaud, чекаш снимката да стигне до телефонот, да се качи во облакот и дури по обработката да добиеш нешто. Затоа го градиме Ambi, за вештачката интелигенција да се користи секогаш и насекаде“, вели Мо, кој е и коосновач и извршен директор.

Апетитот не застанува тука. Најавената апликација за десктоп ќе гледа што работиш и ќе ги памети важните делови, а компанијата подготвува и сопствен уред со екран, звучник, камера и микрофони. Ambi има над 50 вработени во Сан Франциско, Пекинг, Шангај и Шенжен и вработува инженери за модели за препознавање говор.

Приватноста е местото каде што приказната почнува да шкрипи. Мо вели дека слушањето во позадина е стандардно исклучено и дека корисникот може да го прекине во секој момент, дека снимки не се чуваат и дека податоците се шифрирани – но не прецизирал со какво шифрирање. А за луѓето околу корисникот, одговорот е искрен до непријатност: „Мораме да ги информираме корисниците дека треба да им кажат на другите дека снимаат. Ние, како индустрија, не сме го решиле овој проблем. Ако корисникот сака да го сокрие снимањето, ние не можеме да го спречиме“, вели тој.

Со други зборови, одговорноста ја префрла на оној што носи часовник на раката. Некои бележници за состаноци веќе се тужени затоа што снимале разговори без согласност, а и функцијата Audio Intelligence на Apple, што постојано го транскрибира говорот, отвори прашања за приватноста. Замисли состанок или кафе на кое еден од масата носи уред што слуша, а другите не знаат. Колку луѓе навистина би кажале на глас „те снимам“?