Нотингем под Робин Худ: пештери издлабени под градот, паб во карпата до замокот и дабот во Шервуд каде што наводно се криел одметникот

Кога принцот Хари и Меган во декември 2017 го избраа Нотингем за својот прв заеднички официјален настап, само неколку недели по објавата на свршувачката, градот доби кралска фотографија. Речиси девет години подоцна, војводите од Сасекс се враќаат таму – во Community Recording Studio, социјален проект што им помага на младите преку креативни и спортски активности. Добра пригода да се види што крие Нотингем покрај легендата.

А легендата е неизбежна. Робин Худ, одметникот што им земал на богатите за да им дава на сиромашните, е лицето на градот: неговата статуа стои кај замокот, а приказната за него има место и во музејот. Балканот ги има своите ајдути и песни за нив – Англија од својот направи туристички бренд.

Замокот на карпата

Замокот Нотингем стои на Касл Рок, карпа на која речиси илјада години се одвиваат клучни настани од англиската историја. Зградата што ја гледаат посетителите денес е резултат на неколку обнови, а во нејзиниот музеј и галерии се раскажува локалната историја и, се разбира, приказната за Робин Худ. Најинтересниот дел е под земја: тури низ пештерите на замокот, меѓу кои Mortimer’s Hole и King David’s Dungeon.

Град под градот

Под Нотингем се протега широка мрежа од пештери издлабени во карпата, кои со векови служеле како визби, магацини и работилници. Во City of Caves се шета низ ходници, низ средновековна кожарска работилница и низ засолништа од воздушни напади од Втората светска војна. Во една тура се минуваат векови – од кожарите до луѓето што се криеле од бомбите.

Веднаш до замокот е Ye Olde Trip to Jerusalem, паб издлабен во карпата, за кој се вели дека е еден од најстарите во Англија. Пиво во пештера, под тврдина – тешко дека некој туристички маркетинг би смислил подобра приказна.

Чипка, тули и уметност

Лејс Маркет некогаш бил центар на производството чипка и сè уште ги чува магацините и фабриките од црвени тули. Таму е и црквата Света Марија, најстарата парохиска црква во градот. Старите индустриски згради денес ги полнат кафулиња, независни продавници и културни простори, а во соседниот кварт Хокли има уште мали дуќани, кафулиња и креативни бизниси.

Галеријата Nottingham Contemporary нуди привремени изложби на модерна и современа уметност, и тоа со бесплатен влез. Централниот плоштад Олд Маркет Сквер е место за пазари и настани.

Елени и дабот на одметникот

Волатон Хол е елизабетанска палата во голем парк каде што слободно шетаат елени, а во неа е сместен Природонаучниот музеј на Нотингем. Подалеку од градот, во грофовијата Нотингемшир, е шумата Шервуд и Мејџор Оук – многу стар даб за кој се вели дека бил едно од скривалиштата на Робин Худ.

За ноќевање, Колвик Хол е џорџијанска палата на периферијата на градот, поврзана со семејството на лордот Бајрон. За вечера, Restaurant Sat Bains with Rooms има две ѕвезди Michelin и само седум соби. Од легенда за одметник до две ѕвезди Michelin – Нотингем успеал да ги продаде и двете.