САД и Кина постигнаа договор што ќе му овозможи на „TikTok“ да продолжи да работи во Америка, но под многу строга контрола. Според новите правила, американските корисници ќе ја задржат контролата врз софтверот за препораки на апликацијата, а нејзините американски операции ќе бидат целосно издвоени од кинеската сопственост на „ByteDance“.

Новите американски сопственици ќе изнајмат копија од алгоритмот на „ByteDance“, кој потоа ќе биде реконструиран и повторно трениран од „Oracle“ во партнерство со американската влада. Сите податоци на околу 170 милиони американски корисници ќе бидат сместени на серверите на „Oracle“, без пристап за кинеската страна.

Ова значи дека „ByteDance“ ја губи контролата и врз податоците и врз алгоритмот, и ќе задржи помалку од 20% удел во сопственоста. Американскиот конзорциум, кој ќе поседува 80% од бизнисот, вклучува стари инвеститори како „General Atlantic“ и „Susquehanna“, но и нови имиња – меѓу нив медиумскиот магнат Руперт Мардок преку „Fox Corp“ и бизнисменот Мајкл Дел, основач на „Dell Technologies“.

Претседателот Доналд Трамп и кинескиот лидер Си Џинпинг го одобрија овој договор, кој доаѓа по законот усвоен од Конгресот за присилна продажба на „ByteDance“. Со тоа е избегната национална забрана за „TikTok“, која претходно беше неколкупати одложувана.

Американските власти нагласуваат дека договорот гарантира сигурност и заштита на податоците, но и целосна контрола врз алгоритмот кој ја обликува содржината на платформата. Од Белата куќа додаваат дека овој аранжман ќе обезбеди „TikTok“ да остане достапен за американските корисници, но во иднина под строга регулатива и контрола.