Почина Васко Јолески: шест години живееше со механичка пумпа за срцето и се бореше за пациентите што чекаат донор

Почина Васко Јолески од Струга, претседател на Националното здружение „Храбро срце“. Повеќе од шест години живееше со механичка пумпа што му помагаше на срцето да ја испумпува крвта, додека чекаше донор и трансплантација.

Неговата борба започна во 2011 година, кога му беше дијагностицирана тешка срцева слабост. Во 2020 година му беше вградена механичка циркулаторна потпора и оттогаш неговиот секојдневен живот зависеше од уредот, од батериите и од медицинската опрема.

Јолески не ја користеше својата приказна само за себе. Како претседател на „Храбро срце“, стана препознатлив глас на пациентите што живеат со механичка поддршка на срцето. Јавно зборуваше за високите трошоци за лекување, за проблемите со кои се соочуваат овие пациенти и за потребата од системска поддршка од здравството. Постојано потсетуваше и колку е важно органодарителството. „Кога ќе добиеме нов орган, не сме веќе инвалиди на трудот, туку работоспособни лица кои придонесуваат за општеството“, велеше тој.

Неодамна, по години чекање, се појави можност за трансплантација на срце. Јолески ја прифати. Доколку зафатот се реализираше, тој можеше да стане првиот пациент со механичка циркулаторна потпора кај кого ќе се изврши трансплантација на срце. Пред да замине во болница, на новинарите им кажал дека, ако сè помине добро, за една недела ќе даде интервју, овојпат како човек со ново срце. Тој разговор не се случи.

Околностите околу неговата смрт не се јавно познати и за нив нема да шпекулираме. Но прашањата што ги поставуваше остануваат отворени. Дали пациентите со механичка поддршка на срцето денес имаат системско решение за трошоците на кои тој со години укажуваше? И колку луѓе во Македонија во моментов чекаат донорски орган, без некој што толку гласно ќе зборува за нив?