100 нови амбулантни возила за Итната помош, а министерот признава: најмногу фалат возачи

Сто бели возила наредени на паркинг, премиер, министер и камери. Итната медицинска помош добива 100 нови амбулантни возила, опремени со ЕКГ-апарати, дефибрилатори, опрема за респираторна поддршка и климатизација. Добра слика. А потоа, на новинарско прашање, министерот за здравство Сашо Клековски ја кажа реченицата што вреди повеќе од целата промоција: најтесното грло во Брзата помош се – возачите.

Бројките се вакви. Во моментов службите располагаат со околу 140 активни возила. Од новите 100, 60 одат за зголемување на капацитетот, а 40 ги заменуваат дотраените. Така вкупниот број треба да стигне до околу 200. Министерството веќе разговара за уште 50 возила следната година. Распределбата, вели Клековски, ќе оди по критериуми: број на жители, територија, годишни интервенции, транспорти и состојба на постојните возила. Возилата ќе тргнат на терен откако тимовите ќе поминат обука за новата опрема.

Анализата на кадрите на национално ниво, по категории возачи, лекари и медицински сестри, со прогноза за пензионирања до 2030 година, покажала каде е најтесното грло – кај луѓето зад воланот. Министерството ќе разговара со здравствените установи и со Министерството за финансии. Со други зборови: возилата ги имаме, парите за луѓето уште се бараат. Колку од 200-те возила ќе стојат во гаража затоа што нема кој да ги вози?

Премиерот Христијан Мицкоски промоцијата ја искористи за поширок биланс: 120 возила за МВР, околу стотина за Пошта, 53 за чистење во општините, а наскоро и 150 електрични автобуси. „Многу работи се запоставени, многу работи се уништени, многу работи се украдени“, рече тој, признавајќи дека „не е сè решено со овие 100 возила“. Во тоа тешко е да не се согласиш со него.

Клековски најави и реформи: Итната помош да се одвои како посебна служба од Здравствениот дом Скопје, па тоа да се прошири на национално ниво, национални стандарди за тријажа, национален диспечерски центар и постепено воведување парамедици. „Граѓаните не ги знаат општинските граници на здравствените домови“, рече министерот – и е во право. Кога некој ќе падне на улица, не го интересира чија е амбулантата, туку дали ќе дојде. А за да дојде, покрај возило ѝ треба и возач.