ССКМ против кратење на празниците, но со нов предлог: работниците да се плаќаат по одработен час

Кога една стопанска комора предлага помалку празници, а друга јавно се спротивставува, работникот лесно може да помисли дека конечно некој од бизнисот застанал на негова страна. Вреди да се прочита и вториот дел од реченицата.

Сојузот на стопански комори на Македонија (ССКМ) не се согласува со предлогот на Стопанската комора за кратење на празниците. „Македонија има вредни, посветени и чесни луѓе кои сакаат да работат. Затоа, нашиот фокус не треба да биде на намалување на празниците. Нашиот таргет е како да се зголеми продуктивноста“, рече претседателот на ССКМ, Горан Ѓорѓиевски, пред тркалезната маса „Посилен глас на бизнисот за реформите“.

А како да се зголеми продуктивноста? Ѓорѓиевски отвора тема: плаќање по работен час, „по примерот на развиените пазарни економии“. Според него, некој би можел да работи три часа еден ден, а пет часа друг, зависно од потребите и можностите, што особено би им помогнало на родителите и на мајките да ги усогласат работата и семејството. Моделот, велат од Сојузот, ќе ги фаворизира работливите, кои ќе можат да заработат повеќе.

Флексибилноста звучи убаво во презентација. Но кој одлучува колку часа ќе работиш утре – ти или работодавачот? Таму каде што часовната исплата е правило, таа обично оди заедно со законска минимална саатнина и правила за прекувремена работа. Ќе дојдат ли и тие правила во пакетот, или ќе ја увеземе само саатнината?

Владата засега е претпазлива. Заменик-министерот за економија и труд, Марјан Ристески, вели дека прашањето е разгледувано повеќепати и дека плаќањето по одработени часови е една од опциите што треба да се анализираат, а дебатата треба да се води во Економско-социјалниот совет, со синдикатите и работодавачите на иста маса. Тоа е вистинското место. Затоа што кога работниците ќе бидат плаќани по час, секој час без работа ќе биде час без плата – и тоа треба да го знаат пред да аплаудираат.