Божиновска ја преживеа интерпелацијата со 63 гласа против, прашањата за ЕСМ, броилата и „Чебрен“ останаа отворени

Собранието не ја изгласа интерпелацијата за министерката за енергетика, рударство и минерални суровини Сања Божиновска. За гласаа 19 пратеници, против 63, воздржани немаше. Интерпелацијата ја поднесе Левица, а ја поддржаа и пратениците на СДСМ.

Расправата отвори многу повеќе отколку што може да реши едно гласање. На маса беа состојбата во ЕСМ, цените на струјата, мрежарината, „Чебрен“ и „Галиште“, гасификацијата и поврзувањето со европскиот енергетски пазар. Благој Бочварски од СДСМ го постави прашањето за договорот поврзан со електричните броила и ЕВН, тврдејќи дека јавноста сè уште нема јасни одговори, и потсети на најавите за гасоводи, модернизација на ТЕЦ „Неготино“ и водородот. Фатмир Битиќи тврдеше дека државата нема затворена финансиска конструкција за „Чебрен“ и „Галиште“ и дека доцнењето на пазарните реформи ги става домашните производители во неповолна положба.

Опозицијата укажа и на доцнењето со интеграцијата на домашниот пазар во европскиот и со обврските од европскиот механизам за јаглеродно гранично прилагодување, како и на сомнежите за условите под кои се откупува струја од фотоволтаичните електрани.

Божиновска одговори дека дел од прашањата се однесуваат на надлежности на други – енергетските компании, регулаторот, локалната самоуправа. Нејзината главна теза беше дека Министерството е нова институција што морало да се изгради „од нула“. „Вистината не се утврдува со бројот на пишани критики и со цитати од Вибер, туку со силата на доказите“, порача таа од говорницата. Пратениците на мнозинството го наведоа новиот Закон за енергетика, со кој за првпат е дефинирана енергетската сиромаштија, субвенциите за инвертер клими, набавката јаглен од Косово преку меѓудржавен договор и повторното пуштање на продуктоводот Солун – Скопје.

Аргументот „тоа не е наша надлежност“ во Собранието функционира – 63 гласа го потврдија. Но ЕСМ е државна компанија, ЕВН е под надзор на државниот регулатор, а „Чебрен“ со децении се движи меѓу студии, тендери и концесиски модели. Кога секој е надлежен само за парче, никој не одговара за целото.

Интерпелацијата заврши, министерката останува. Прашањата за цената на струјата, финансиите на ЕСМ и тоа кога „Чебрен“ ќе стане нешто повеќе од најава останаа таму каде што беа и пред гласањето. Само што граѓаните не плаќаат надлежности – плаќаат струја.