Тетово за два дена: 14-годишник со тешки повреди од училишен двор, 62-годишник нападнат од малолетници, момче бегало од мотоцикл

На 29 октомври околу 12:30 часот Ургентниот центар во Тетово ја извести полицијата дека примил 14-годишно дете од тетовско село со тешки телесни повреди. Според пријавеното, го нападнал врсник, и тоа во кругот на училиштето. Значи, на местото каде што родителите наутро го оставаат детето верувајќи дека е безбедно.

Исто така околу 12:30 часот, во близина на трговски центар во Тетово, двајца малолетници од 17 и 16 години го нападнале М.Ш. (62) од село Одри и му одзеле пари. Кога човекот успеал да го задржи 17-годишникот, тој му нанел повреда со остар предмет. Полициска патрола што поминувала таму го приведе напаѓачот, а 16-годишникот бил пронајден попладнето во 16:15 часот. Двајцата се задржани во полициска станица и се очекува поднесок.

Следниот ден билтенот продолжува. Во 15:15 часот татко заедно со 14-годишниот син пријавил физички напад од соученик од тетовско основно училиште. Дали тоа има врска со случајот од претходниот ден, полицијата не кажува. Дваесет минути подоцна друг татко пријавил дека неговиот малолетен син, враќајќи се дома од фудбалски тренинг, забележал дека го следат двајца на мотоцикл со намера да го нападнат. Момчето успеало да избега.

Мотиви нема во ниту еден од овие билтени. Има само реченица што се повторува: се преземаат мерки за расчистување на случајот. Во меѓувреме, дел од тетовците раскажуваат дека своите деца насекаде ги возат со автомобил, од страв да не бидат нападнати.

Секој случај поединечно е работа за полиција. Заедно, тие се прашање за многу повеќе институции. Кој одговара за дете со тешки повреди во двор на училиште? Што направи училиштето, што направи Министерството за образование? И уште поважно: колку вакви билтени треба да се наредат еден до друг, за некој од надлежните да излезе и да каже што всушност се случува со децата во Тетово?