Германија ги предупредува пратениците дека нивните iPhone телефони можеби се хакирани со шпионски софтвер: Apple испрати предупредувања во 99 земји, а кој стои зад нападите не се знае

Германската сојузна служба за сајбер-безбедност, BSI, за викендот објави дека пратеници во Бундестагот и други, неименувани познати личности добиле предупредувања од Apple дека нивните телефони можеби биле цел на напад. Неколку дена претходно Apple почна да праќа известувања до луѓе за кои смета дека се нападнати со шпионски софтвер.

Владиниот портпарол Штефан Корнелиус изјави дека Берлин „многу сериозно ги сфаќа инцидентот и предупредувањето“, но не кажа кој во федералната влада бил на мета. Ниту дали меѓу нив е и канцеларот Фридрих Мерц. Дали Берлин не знае, или не сака да каже?

Ваков шпионски софтвер може да краде пораки, локација и други чувствителни податоци од телефонот, а често користи напади за кои жртвата не мора да кликне на линк ниту да отвори фајл. Телефонот се пробива речиси невидливо. Apple не кажува која влада стои зад нападите, ниту потврдува дали некој телефон навистина е компромитиран. Затоа BSI им порачува на сите што добиле такво известување „да претпостават дека нивниот уред можеби е компромитиран“.

Германија не е единствена. Филмаџијата од Бејрут Радван Мортада, веќе нападнат со шпионски софтвер во 2021 година, објави на X дека добил ново известување за „уште еден напад врз вашиот уред“. Според тоа известување, последниот бран предупредувања од Apple отишол до корисници во 99 земји. Кој стои зад оваа рунда напади и која влада ја нарачала, засега не се знае.

Тука приказната станува непријатна за Берлин. Владите ретко сами ги прават овие алатки – ги купуваат од приватни фирми што во индустријата ги нарекуваат „платеници“ на шпионскиот софтвер. Најпозната е израелската NSO Group, која го продава контроверзниот Pegasus. А германската сојузна криминалистичка полиција, BKA, според објавени информации, купила пристап до Pegasus уште во 2019 година. Државата што денес ги брои хакираните телефони на своите пратеници и самата пазарувала на тој пазар.

Балканот приказни за прислушувани политичари знае напамет, и ова е потсетник дека телефонот на политичарот одамна е прва линија на фронтот. Ако може да се пробие телефон на германски пратеник, колку е безбеден телефонот на кој било министер во регионот?